nepal news

सहमति खोज्ने सहमति
मंसिर १ - अन्तरिम संसद् हिउँदे अधिवेशनको पूर्वसन्ध्यामा शनिबार सातदलीय गठबन्धनका प्रमुख दल कांग्रेस, एमाले र माओवादीले राजनीतिक गतिरोध अन्त्यका लागि तत्काल साझा सहमति खोज्ने 'सहमति' गरेका छन् । अधिवेशन सोमबारदेखि सुरु हुँदैछ ।
तीन दलका नेताहरूबीच भएका छुट्टाछुट्टै छलफलमा निकास खोज्न तत्काल सात दल बैठक बोलाउने सहमति पनि भएको छ । अन्य चार दलका नेतासितको छलफलपछि मिति तय गरी बैठक बस्ने निर्णय उनीहरूले गरेका छन् ।
'एक/दुई दिनमै सात दल बैठक बस्नेछ । त्यसले संकटको निकास निकालोस् भन्ने उद्देश्यले छलफल सुरु गरिएको हो,' कांग्रेसका महामन्त्री रामवरण यादवले भने- 'शान्ति प्रक्रिया नबिथोल्ने, संविधानसभा गर्ने र दलहरूकोे एकता कायमै राख्ने सहमति भएको छ ।' छलफलमा कांग्रेसका कार्यवाहक सभापति सुशील कोइराला, उपसभापति प्रकाशमान सिंह, महामन्त्री रामवरण यादव र प्रवक्ता अर्जुननरसिंह केसीलगायतको सहभागिता थियो । बुद्धनगरस्थित माओवादीको केन्द्रीय कार्यालयमा भएको छलफलमा कांग्रेस नेताले विशेष अधिवेशनमा भएको मत विभाजनले दलहरूबीच अविश्वास र दूरी बढाएको धारणा राखेका थिए ।
माओवादीले प्रधानमन्त्रीकोे 'सहमति बन्न नसके मतदानको प्रक्रियामा जानु ठीक' भन्ने धारणाको स्मरण गराउँदै सहमति खोज्ने प्रयत्न असफल भएपछि त्यो अवस्था आएको बताएका थिए ।
माओवादीले १२ बुँदे समझदारी देखिकै दलहरूका क्रियाकलापको समीक्षा गर्नुपर्ने तर्क गरेको थियो । अध्यक्ष प्रचण्डले वैशाख ११ मा जनआन्दोलन सफल भई संसद् पुनःस्थापना भएपछिको अवधिमा कांग्रेस र एमालेले त्यो सफलताको भागीदार माओवादीलाई बनाउन कन्जुस्याइँ गरेको र एकलौटी किसिमले व्याख्या गरेको भनी असन्तुष्टि जनाएको बैठकमा सहभागी माओवादी नेता मोहन वैद्यले बताए । 'पुरानो गल्ती- कमजोरीलाई सच्याउँदै गतिरोधका गाँठा फुकाउने सहमति भएको छ,' वैद्यले भने- 'तर विषयवस्तुको गहिराइसम्म छलफल अझै भइसकेको छैन ।' छलफलमा माओवादीका अध्यक्ष्ा प्रचण्ड, वरिष्ठ नेता बाबुराम भट्टराई, रामबहादुर थापा -बादल), मोहन वैद्य र प्रभाकर सहभागी थिए ।
कांग्रेस-एमालेका नेताबीचको छलफल सिंहदरबारस्थित एमाले संसदीय दलको कार्यालयमा भएको थियो । एमालेले विशेष अधिवेशनबाट पारित दुई प्रस्ताव कार्यान्वयनबारे कांग्रेसको धारणा बुझ्न छलफल भएको बताएको छ । द्विपक्षीय बैठक मूलतः सातदलीय गठबन्धनमा प्रभावी रहेको आपसी अविश्वास हटाउन, राजनीतिक गतिरोध अन्त्यका उपाय खोज्नेमा केन्दि्रत रहेको स्थायी समिति सदस्य अमृतकुमार बोहराले बताए ।
'विशेष अधिवेशनबाट पारित प्रस्ताव कार्यान्वयन गर्ने सहमति जुटाउन पहल गर्ने शुक्रबारको स्थायी समितिको निर्णयअनुसार भेटघाट सुरु गरेका हौं×,' बोहराले भने- 'कुनै ठोस निर्णय नभए पनि वार्ताबाटै सहमति निकाल्ने र सात दल एकता कायम राख्ने निष्कर्षमा पुग्यौं ।