26 नोभेम्बर, 2007 16:00 GMT सम्मका समाचारहरु
माओवादी विरुद्ध पेशाकर्मी आन्दोलनमा
पेशाकर्मीहरुले प्रतिबन्धित क्षेत्रको अवज्ञा गर्दै माओवादीहरुको विरोध गरेका थिए गत साता माओवादी कार्यकर्ताहरुले एउटा मेडिकल कलेजका पदाधिकारीलाई अपहरण गरी कुटपीट गरेको विरोधमा विभिन्न पेशागत संगठनहरुले शुरु गरेको संयुक्त आन्दोलन चर्किदै गएको छ। सोमबार बिहान कार्यालय समय शुरु हुनै लाग्दा देशको राजनीतिक एवं प्रशासनिक मुख्यालय सिंहदरवारको पश्चिमी ढोकामा चिकित्सक, पत्रकार, वकिल, प्राध्यापक, शिक्षक, विद्यार्थी र इन्जिनियर लगायतका पेशाकर्मीहरुले एक घण्टा धर्ना दिएका थिए। आन्दोलनको अगुवाइ गरीरहेको नेपाल मेडिकल एशोसियसनका अध्यक्ष डा चोपलाल भुषालले पेशाकर्मीहरुको सुरक्षाको प्रत्याभूति हुनुपर्ने र दोषीमाथी कारवाही हुनु पर्ने आफुहरुको माग रहेको बताए। नारा, जुलुस प्रदर्शन गर्न प्रतिबन्ध लगाइएको सो क्षेत्रमा आन्दोलनकारीहरुले भने निर्वाधरुपमा दोषीमाथि कारवाहीको माग गर्नुका साथै माओवादी र गृहमन्त्रीको विरोधमा नाराबाजी गरेका थिए। निकै विवादास्पद बनीरहेको योङ्ग कम्युनिष्ट लिग (वाइसिएल) का कार्यकर्ताहरुले गत साता बिराटनगरस्थित नोबेल मेडिकल कलेजका व्यवस्थापकहरुलाई अपहरण गरी चरम यातना दिएको विरोधमा आन्दोलित भएको उनीहरुको भनाइ छ। शेयर सम्बन्धी कलेजको पुरानो आन्तरिक विवादमा माओवादी केन्द्रिय नेतृत्वले शुरूदेखि नै एउटा पक्षलाई संरक्षण दिने गरेको खबर आउने गरेको थियो।
चेतावनीअध्यक्ष डा भुषालका अनुसार गृहमन्त्री कृष्णप्रसाद सिटौलाले शनिबारसम्म दोषीमाथि कारवाही गर्ने वचन दिएका थिए। तर चौथो दिनसम्म पनि त्यसबारे कुनै जानकारी नदिइएको उनले बताए।
उनले भने, "त्यसैले आन्दोलनमा उत्रिनु परेको हो।" धर्नापछि आयोजित कार्यक्रममा माग पुरा नभए थप सशक्त आन्दोलन गर्ने चेतावनी उनीहरुले दिएका थिए। वाईसीएलका नेताहरुले सो घटनालाइ गम्भीर कमजोरी भन्दै सार्वजनिक रुपमा क्षमायाचना गरीसकेका छन्।
No comments:
Post a Comment